Собранието на Република Македонија денеска ќе ја одржи 39. седница, на која меѓу другото ќе се разгледувува предлог-законот за изменување и дополнување на Законот за личната карта во прво читање и предлог-одлуката за одобрување на финансискиот план на Македонската радио-телевизија за 2015 година.
На дневен ред пред пратениците ќе бидат и предлог-закон за изменување на Законот за градежно земјиште во второ читање и предлог-закон за изменување и дополнување на Законот за продажба и давање под закуп на деловните згради и деловните простории на Република Македонија во прво читање.
Пратениците треба да расправаат и за предлог-одлука за објавување на јавен оглас за именување на член на Комисијата за заштита на конкуренцијата, предлог-закон за изменување и дополнување на Законот за царинската тарифа, предлог-закон за дополнување на Законот за иновациската дејност, како и дополнет предлог-закон за изменување на Законот за шумите, сите во второ читање.
Собранието треба да ги разгледа и дополнетиот предлог-закон за изменување и за дополнување на Законот за електронските комуникации, дополнетиот предлог-закон за изменување и за дополнување на Законот за животната средина, предлог-законот за изменување и за дополнување на Законот за комуналните дејности, во второ читање.