Повеќе од 26 проценти од работниците што работат во компаниите се непријавени. Најмногу ги има во секторите земјоделство, градежништво, транспорт, хотели, ресторани, трговија и услуги, претежно во мали и во средни бизниси.
Ова беше истакнато денеска на потпишувањето на Меморандумот меѓу претставници на Државниот инспекторат за труд, Организацијата на работодавци, Бизнис-конфедерацијата, Сојузот на синдикати на Македонија и Конфедерацијата на слободни синдикати на Македонија, при што ќе се преземат координирани активности и мерки за намалување на непријавената работа.
Непријавената работа во Македонија се движи меѓу 20 и 35 проценти од домашниот бруто-производ. Најчесто се непријавени студентите, пензионерите и сезонските работници.