Лидерот на ДУИ Али Ахмети успеа да го разгори национализмот и екстремизмот, како подлога за конфронтации и дестабилизација на Македонија, оцени денеска Демократскиот сојуз.
„Платформата за целосно разрешување на албанските прашања, во многу му помогна на раководството на ВМРО ДПМНЕ, да ја измести темата за одговорност на креаторите на политичката криза и да поттикне и насочи дискусија за ’македонските работи’. Подготовката на ’македонска платформа’, најавите за блокада на работата на Парламентот и заканите со протести да се урниса државата доколку опозицијата формира Влада, се одлична можност за прогласување на вонредна (читај воена) состојба и суспензија на институциите и изборната волја на граѓаните’, стои во соопштението од ДС.
Според ДС, наместо да се гради платформа за правна држава, еднакви права за сите, борба против криминалот и подобар живот за сите, платформата на Ахмети ја враќа земјата во 19-от век.
„Време е за обединување на граѓаните и расчистување со популистите и пропагандистите за наводна загрозеност на Албанците или Македонците“, оценуваат од ДС.