Двајца бразилски падобранци загинаа вежбајќи ја кореографијата за отворањето на Летните олимписки игри во Рио де Жанеиро, кои ќе се одржат од 5 до 21 август годинава.
Како што јавуваат бразилските медиуми, 28 падобранци се обидувале во воздух да ги направат петте олимписки круга, но двајца од нив, 39-годишниот Густаво Кореа Гарцез и 47-годишниот Гилхермо Бастос Падиља, се судриле во воздух, по што изгубиле контрола и паднале на земја.
Падиља починал веднаш по ударот на земја, додека Гарцез во болница им подлегнал на повредите.
Бразилската полиција поведе истрага за несреќата и ќе ја тестира опремата со која настрадале падобранците.