Нови 1.000 млади лица годинава може да стекнат практично знаење во компаниите што ќе се пријават за учество во Програмата за практикантство, а со тоа да добијат и можност за вработување. Програмата ја спроведува Агенцијата за вработување од 2009 година, а досега од потпишани 1.400 договори, вкупно се вработени 1.070 лица. Учествуваат компании од разни сектори, но најчесто од услужниот сектор, од производството, правни и сметководствени бироа.
– Во тек е нова постапка, односно веќе е распишан оглас за сите приватни компании што сакаат и имаат можност да учествуваат во Програмата за практикантство. Ова е одлична можност за невработените млади лица, за оние кои имаат завршено средно и високо образование да стекнат практична работа и искуство во реални услови кај приватните компании. Исто така, да даваат сè од себе, да го покажат својот максимум и побргу и полесно да стекнат работен однос. Истовремено, оваа мерка за практикантство претставува одлична можност за приватните компании да најдат соодветен кадар, да ги обучат практикантите и сите што ќе покажат интерес и ќе се покажат во работата како амбициозни млади луѓе, потоа да се вработат – изјави министерот за труд и социјална политика, Диме Спасов, при денешната посета на компанијата „Винер осигурување“, која, како што рече, е успешен пример во оваа програма, преку која се вработени 30 проценти од вработените во компанијата.