Иако требаше да почне денеска, одложено е судењето на поранешниот претседател на Основен суд Скопје 1, судијата Владимир Панчевски, по приватната тужба за мобинг што против него ја поднесе поранешниот раководител на одделението за човечки ресурси на судот, Горан Стаменковски.
Панчевски не се појави во судницата во Основен суд Скопје 2, иако, како што вели адвокатот на тужителот, бил уредно поканет.
– И покрај тоа што Панчевски имаше уредна покана да се појави пред судот, тој не дојде, што претставува игнорирање на судот како институција и кон нас како колеги – изјави Душко Јанковиќ, адвокат на тужителот Стаменковски.
Поранешниот прв човек на одделението за човечки ресурси на Основен суд Скопје 1 се жали дека Панчевски подолг временски период го прераспоредувал на други работни позиции и го казнувал. Тужителот морал и да исполни норма која не постои во праксата на судот, се наведува во тужбата.
Основниот суд Скопје 2 на 28 декември лани ја прифати приватната тужба за мобинг поднесена од Стаменковски.