Правилно и законски да се исплати платата, согласно Законот за минимална плата, побара Независниот синдикат на здравствени работници на денешната прес-конференција.
Независниот синдикат при КСОМ најави протести за време на паузите, затворање на болниците и поликлиниките од 11 до 14 часот и генерален штрајк во здравството доколку во април паралелно со зголемената минимална плата за околу 2.300 денари линеарно не се покачат и платите на сите вработени во јавното здравство.
„Да не се игра со чувствата на вработените во здравството, уште еднаш да не бидеме изманипулирани, бараме правилно и законски да се исплати платата согласно со законот за минимална плата. Ова наше барање е основано и во согласност со законот за минимална плата“ изјави Боби Бојчевски, национален координатор на Независниот синдикат за здравство при КСОМ.
Освен покачување на платите, синдикалците бараат и решавање на статусот на вработените со договори на дело.
Синдикалците велат дека овој проблем е присутен подолго време и има вработени кои работат и по 13 години без регулиран професионален статус