Кривични пријави против Јанко Илковски и Миленко Неделковски поднесе Коалицијата за сексуални и здравствени права на маргинализираните заедници. Пријавите се поднесени поради ширење говор на омраза, поттикнување насилство и дискриминација кон членовите на ЛГБТ-заедницата, објави „Нова“.
-Не се работи за изолиран случај во кој овие двајца новинари, преку својот хомофобичен говор, предизвикувале и директно насилство врз ЛГБТ-заедницата, туку веќе во доказните средства имаме собрано материјали против нив. Се работи за тренд – вели Драгана Дрндаровска од Коалицијата за сексуални и здравствени права на маргинализираните заедници.
Во изјавата која Неделковски ја дал за „Нова“ вели дека нема коментар. „Ќе се видиме на суд, па таму ќе коментираме“, рекол тој.
Од коалицијата велат дека доколку Обвинителството ја премолчи и оваа пријава, по поминувањето на рокот ќе се обратат до Вишото јавно обвинителство, а понатаму и до Европскиот суд за човекови права.
Дискриминацијата по секоја основа е забранета во Кривичниот законик.