Инфлацијата во ноември забележа благ пораст на месечна основа. На годишна основа и во просек во првите единаесет месеци од годината, општото ниво на цените во домашната економија и понатаму бележи пад (намалување од 0,3 отсто), се вели во најновиот извештај на НБРМ.
– Во услови кога и цените на храната и базичната инфлација, во просек, за целиот период бележат годишен пораст, намалувањето на цените е последица на падот на цените на енергијата. Остварувањата се малку под проекциите, што заедно со очекувањата за пониски светски цени на енергијата и на прехранбените производи, упатува на надолни ризици за проекцијата за инфлацијата за следниот период. Честите промени во очекувањата за цените на примарните производи упатуваат дека неизвесноста околу идното движење на овие производи е значителна, а можноста за ненадејни промени кај овие категории е голема – се вели во соопштението на Народна банка.