Дали имало пазар меѓу двете најголеми партии во земјата, јавно се посомневаа и прашуваат од ВМРО-НП. Од партијата на Љубчо Георгиевски, но и граѓаните на Охрид, како што велат, се разочарани од содржината на „бомбата“ на СДСМ вчера во Охрид, реагираат од општинскиот разгранок во Охрид.
„Иако беа многу поголеми, особено по изјавата на претседателот на СДСМ, Зоран Заев, дека Бакрачески не ќе може да се додржи на градоначалничката функција откако ќе слушне како стигнал до неа, сепак очекувањата не се остварија. Додека во другите градови каде што СДСМ одржуваше прес-конференции со локални теми, имаше материјали за функционери од градовите, од Охрид не слушнавме за никого. ВМРО-Народна партија се прашува дали општинската организација на СДСМ ги штити локалните моќници на ДПМНЕ или, пак, тие се сосема „чисти“. Времето ќе покаже дали и каков пазар имало меѓу двете најголеми партии. СДСМ не ги исполни очекувањата на граѓаните околу долгонајавуваната „бомба“. Со ваков однос, СДСМ може да биде само соучесник во сомнителните работи на власта, а нема целосно да го разобличи режимот“, стои во дописот до медиумите.
ВМРО-НП, со двајца советници, го правеше мнозинството на СДСМ во претходниот Совет на Општината, а и денес настапува опозициски.