Високата претставничка за надворешна политика на ЕУ, Федерика Могерини очекува дека Унијата во јули ќе ги продолжи санкциите кон Русија поради кризата во Украина, пишува германскиот весник „Велт“.
Одговарајќи на прашање дали санкциите кои истекуваат во јули ќе бидат продолжени, Могерини рече „Очекувам и тоа да се случи“.
Могерини во соопштение, кое е објавено по интервјуто додаде дека „шефовите на држави или влади на земјите од ЕУ го поврзуваат укинувањето на санкциите со целосна примена на Договорот од Минск“ и оти тоа досега не е сторено.
Одредени членки на ЕУ сугерирале дека санкциите би можеле да бидат ублажени во јули, во обид да се намалат тензиите во односите со Москва, иако склучениот договор не доведе до ставање крај на судирите на истокот на Украина.
Шефицата на европската дипломатија рече дека политиката на ЕУ се уште нема да биде променета, но дека подоцна, во текот на годинава може да следи „суштинска политичка процена“ на идните чекори.
ЕУ во 2014 година воведе санкции кон Русија, а Москва возврати со контрамерки.