Владимир Талески е еден од најдобрите градоначалници во Република Македонија, изјави денеска градоначалникот на Аеродром, Ивица Коневски, додавајќи дека Талески чесно и совесно си ја вршел својата функцијата од 2005 година наваму и затоа трипати по ред ја добива поддршката на битолчани.
– Тоа добро го знае и аболираниот криминалец Зоран Заев. Тој знае дека со луѓе како Владимир Талески, деструктивната политика на СДСМ никогаш нема да добие поддршка од граѓаните. Затоа Зоран Заев, кој е аболиран за криминал тежок осум милиони евра, нарачува политички прогон на градоначалници и на функционери на ВМРО-ДПМНЕ. Затоа Катица Јанева постојано ги следи неговите наредби. Таа мора да биде негов послушник за да ја оправда платата од 3.000 евра. Затоа СДСМ се заканува и врши притисоци врз судиите, бидејќи во партијата знаат дека тука не станува збор за правда базирана на какви било докази, туку за класичен политички линч – рече Коневски.
Градоначалникот на Аеродром истакна дека Јанева и судиите што подлегнале на притисокот од СДСМ се должни да ѝ објаснат на јавноста како е можно да се бара и да се изрече мерка куќен притвор за градоначалникот Талески, а да нема таква мерка за градоначалникот на Струмица.
„Како е можно Владимир Талески, кој редовно се јавуваше на сите судски покани да биде во куќен притвор, а Зоран Заев, кој јавно изјавуваше дека за него не постојат македонските судови и дека нема намера да се одѕива на поканите, да биде на слобода? Конечно, Катица Јанева треба да се соочи со срамот и со судот на јавноста. Треба да ја каже вистината дека нема никаква вина кај Талески, ниту некаква материјална штета за државата. Запазена е целосно законската тендерска процедура и избрана е најдобрата понуда. Дали Катица Јанева знае колкава е просечната цена по ученик во Куманово? Ако не знае, ние ќе ѝ помогнеме. Медиумите веќе објавуваа дека просечната цена за превоз по ученик во Куманово е за 2,5 пати повисока отколку цената што ја плаќа Општина Битола. Ова е факт. Од овој факт бегаат и Зоран Заев и Катица Јанева“, рече Коневски.
Според градоначалникот на Аеродром, селективниот пристап на Јанева е уште еден доказ дека тоа што го прави нема никаква допирна точка со правдата и оти Талески е жртва на политичкиот прогон на Заев и на Јанева.