Претседателот на Република Македонија, Ѓорге Иванов, денеска во Каиро се сретна со претседателот на Арапската Република Египет, Абдел Фатах ал Сиси, со кој разговарал за воспоставената соработка меѓу разузнавањето и безбедносните служби на двете држави со потреба од градење на заеднички капацитети за одговор во борбата против тероризмот, намалување на ризиците од илегалната миграција, електронското војување и сајбер-одбраната.
„Во тој контекст, претседателите се согласија и за почнување на меѓуармиска соработка за размена на искуства и трансфер на знаење во меѓународни мировни мисии, користење на логистички капацитети и едукација на кадар за примена на напредни технологии. Македонскиот претседател изрази благодарност до египетскиот претседател за поддршката и за помошта што Македонија ја добива од Египет во областа на разузнавањето, истакнувајќи дека Египет како земја лидер и гарант на стабилноста во регионот на Северна Африка е важен пријател и партнер на Македонија, и дека тоа пријателство и партнерство ќе продолжи и во иднина“, информираат од кабинетот на Иванов.
Двајцата претседатели разговарале и за унапредување на правната рамка на двете држави, економско-трговската размена и за соработката во областа на културата и на туризмот.