Маја Коцијанчич, портпаролка на Европската комисија, денеска изјави дека очекува конкретни резултати од лидерите на партиите во Македонија.
– Го поздравуваме продолжувањето на разговорите на лидерите на политичките партии во поранешната југословенска република Македонија, вклучително и за имплементацијата на препораките што ги стави на маса Европската комисија и се дел од договорот на 2 јуни. Со нетрпение очекуваме конкретни резултати од овие разговори наскоро. Знаете дека комесарот ја изрази својата подготвеност да олеснува и тоа и понатаму е случај. Преговорите се случија во присуство на европскиот амбасадор. Засега средба со комесарот Хан не е потврдена – изјави Коцијанчич.
Таа рече дека во процесот на олеснување, исто така, важна улога одиграа членовите на Европарламентот од различни политички групи.
– Ако треба да генерализирам, ЕУ јасно ја стави до знаење својата позиција. Не само комесарот, туку и министрите за надворешни работи ја оценуваат ситуацијата, а тие, се разбира, доаѓаат од многу различно политчко потекло. Ова е прашање што треба да го погледнете во поширока перспектива, а тоа е дека земјата има јасна европска перспектива, има работи што треба да бидат сторени, ова е политичка криза која тече, кризата треба да биде решена, ова е порака која пристигна од многу страни во оваа ситуација и важно е работата овде да продолжи – изјави Коцијанчич.