Државниот секретар за европски прашања во Министерството за надворешни работи на Германија, Михаел Рот, од недела до вторник ќе престојува во официјална посета на Македонија и на Србија.
„Беше крајно време да бидат надминати блокадите во поранешната југословенска Република Македонија. Некои политичари ја однесоа земјата во многу тешка ситуација. Затоа сум задоволен од првичните надежни сигнали од новата влада. Премиерот Заев кажа јасно дека сака темелно да се занимава со интеграцијата во ЕУ и дека е искрено заинтересиран за регионално помирување“, се вели во соопштението на германското МНР.
Рот прво ќе го посети Белград, а потоа ќе пристигне во Скопје. Во Белград ќе има средба со премиерката Ана Брнабиќ, како и со министерката за евроинтеграции, Јадранка Јоксимовиќ. Рот ќе се сретне и со претставници на невладиниот сектор во Србија.
По Белград, Рот ќе пристигне во Скопје, но сè уште не е прецизирано со кого ќе се сретне.