Нашиот пат можеби е премногу долг, но следува клучен период. Следува период во кој во Македонија мора да завладее правото. Во Македонија мора да се зајакнат институциите. Македонија мора да ги исполни овие предуслови за конечно да стекнеме полноправно членство во ЕУ и НАТО. Оваа нова Влада на Република Македонија е одлучна да ги спроведе неопходните реформи.
Со таква порака се обратил македонскиот министер за надворешни работи, Никола Димитров, на средбата со својот холандски колега, Берт Кундерс, соопшти македонското Министерство за надворешни работи.
На средбата во холандското Министерство за надворешни работи, Димитров изразил благодарност за континуираната и исклучително важна поддршка што Кралството Холандија ја дава на Република Македонија во остварувањето на стратешките приоритети. Двајцата министри се договориле за посета на министерот Кундерс на Македонија следниот месец.