Ирачките власти тврдат дека Исламска држава извела два напади со хемиско оружје, во кои животот го загубило тригодишно девојче, а околу 600 лица се повредени.
Претставниците на безбедносните агенции и вработените во болниците велат дека најновиот напад се случил во градот Таза, кој и пред три дена бил изложен на удари на ракети полнети со хемиско оружје.
Ранетите имаат повреди на кожата, страдаат од задушување и од дехидратација. Осум лица се префрлени во Багдад на болничко лекување.
Американските и ирачките власти претходно соопштија дека американските специјални сили минатиот месец на северот на Ирак го фатиле шефот на единицата на Исламска држава која настојувала да развие хемиско оружје.
Адел Хусеин, дел од локалната власт на Таза, вели дека се чека тимот германски и американски вештаци, кои треба да го проверат присуството на хемиско оружје.
Од меѓународната коалиција што ја предводи САД велат дека ИД досега користела хлорин и слаб вид на иперит.