Бил Клинтон закрепнува од инфекција во болница во Калифорнија

Поранешниот американски претседател Бил Клинтон закрепнува по дводневниот третман на инфекција во болница во Калифорнија, соопштија неговите лекари во четвртокот.

75-годишниот Клинтон беше примен во Медицинскиот центар Ирвин на Универзитетот во Калифорнија во вторникот вечерта „поради инфекција која не е ковид-19“, објави портпаролот на Клинтон, Ангел Урена на Твитер.

„Тој закрепнува, во добро расположение е и неверојатно е благодарен на лекарите, медицинските сестри и персоналот што му пружаат одлична нега“, напиша Урена. Портпаролот додаде за Ројтерс: „Станува, се шегува и го шармира болничкиот персонал“.

Клинтон отишол во болница откако се уморил и му била дијагностицирана инфекција на крвотокот за која лекарите веруваат дека започнала како инфекција на уринарниот тракт, објави Си-Ен-Ен, повикувајќи се на неговите лекари.

Лекарите на поранешниот претседател, Алпеш Амин и Лиза Бардак, рекоа дека тој „бил примен во болница за внимателно следење и добива 4 антибиотици и течности“.

„Тој останува во болница за континуирано следење. По дводневниот третман, бројот на бели крвни клетки опаѓа и тој добро реагира на антибиотиците“ се вели во соопштението. Тие додаваат: „Се надеваме дека наскоро ќе го пуштиме дома“.

Си-Ен-Ен објави дека тековниот престој на Клинтон во болница не е поврзан со неговите проблеми со срцето.

Демократот Клинтон беше претседател на САД од 1993 до 2001 година. Тој е оженет со Хилари Клинтон, која беше кандидатка на Демократската партија за претседателските избори во САД во 2016 година, на кои беше поразена од републиканецот Доналд Трамп.