Германското министерство за надворешни работи денеска повторно изрази загриженост поради политичката криза во Македонија и соопшти дека од тие причини бил назначен специјален претставник за Македонија, кој ќе помага во надминувањето на кризата.
– Внатрешно-политичката ситуација во ПЈР Македонија нè исполнува со голема загриженост. Излез од сериозната и длабока криза сè уште не е на повидок. Затоа, министерот за надворешни работи, Франк Валтер Штајнмаер, одлучи да именува посебно надлежно лице, т.е. специјален повереник, за ситуацијата во ПЈР Македонија. Тој го замоли амбасадорот Јоханес Хајндл (актуелен амбасадор во Виена) да ја преземе оваа функција. Отсега, амбасадорот Хајндл тесно ќе соработува со Европската комисија и со САД и со други партнери за да ги поддржува во нивното посредување при надминувањето на внатрешно-политичката криза – соопшти портпаролот на германското МНР, Мартин Шефер, на денешната прес-конференција во Берлин.
Шефер истакна дека тоа е израз на ангажманот на сојузната влада на Германиjа во земjите на Западен Балкан, исто така, и во поглед на европската перспектива, која ја имаат овие земји, како и во поглед на нивната интеграција во евро-атлантските структури.