Албанија денеска ќе го отвори своето прво поглавје од пристапните преговори со Европската унија во Луксембург, што претставува напредок во деценискиот обид да се приклучи кон блокот.
Конференцијата за пристап ќе биде втора што се одржува помеѓу ЕУ и Албанија, откако таа стана земја кандидат во 2014 година.
Денешната конференција ќе му овозможи на Брисел да ги испита таканаречените „основи“ на пристапувањето, вклучително и тоа како земјата се усогласува со човековите права, владеењето на правото и функционирањето на демократските институции, пишува „Јуроњуз“.
Разговорите за овие прашања ќе продолжат до самиот крај на пристапните преговори, а напредокот во спроведувањето на барањата на Брисел ќе го одреди целокупното темпо на процесот.
Разговорите беа одобрени од амбасадорите на ЕУ кон крајот на септември откако Албанија беше одвоена од Северна Македонија во нејзината кандидатура за пристап. „Јуроњуз“ пишува дека одвојувањето на двете земји може да се препише на обновувањето на тензиите меѓу „националистичката влада на Скопје“ и „нивните соседи од ЕУ“.
Пристапните преговори на Албанија доаѓаат во време кога се зголемува домашниот притисок врз премиерот Еди Рама. Опозициските поддржувачи минатата недела излегоа на улиците повикувајќи го Рама да се повлече, откако член на про-европската конзервативна Демократска партија на поранешниот премиер Сали Бериша беше затворен поради осудите за клевета.
Опозицијата вели дека Рама владее со железна тупаница, ги замолчува критичарите и ја злоупотребува својата моќ за да ги намали политичките ривали. Инаку, и самиот Бериша е во домашен притвор поради обвинувања за корупција во неговите претходни влади.
Предизвик во разговорите се очекува да бидат и мерките преземени од Тирана за справување со високото ниво на корупција во земјата.
Во својата годишна оценка за напредокот на кандидатите кон членството во ЕУ, Европската комисија минатиот ноември нотираше дека „и покрај одреден напредок и континуираните напори во борбата против корупцијата, таа и понатаму е област на сериозна загриженост“.
Годишниот преглед на американскиот Стејт департмент во 2023 година, пак, покажа дека во Албанија „корупцијата постоела во сите гранки и нивоа на власта“.