Претседателот на Демократската унија за интеграција (ДУИ), Али Ахмети, денеска со амбасадорот на САД, Џес Бејли, разговарал за политичката ситуација, изборите на 11 декември, реформите, владеењето на правото, како и за интеграцијата на Македонија во НАТО и во ЕУ.
Како што соопштија од ДУИ, Ахмети ги презентирал ставовите на неговата партија за политичката ситуација, нагласувајќи дека веродостојни и сеопфатни избори се почеток на решавање на кризата и оти ДУИ е подготвена за избори.
„Владеењето на правото и системските реформи се составен дел од програмата на ДУИ и се столб на нашата понуда заедно со евроатлантската интеграција, добрососедството, меѓуетничките односи и економскиот развој. ДУИ и меѓународните сојузници имаат заеднички цели за демократско општество и затоа нема да престанеме со нашите напори за да ги постигнеме, бидејќи граѓаните го очекуваат тоа од нас“, стои во соопштението од ДУИ.