Министерството за внатрешни работи (МВР) во текот на вчерашниот ден издало потврди за искажана намера за барање азил на вкупно 451 мигрант. Според државјанството, 240 лица што добиле таква потврда се со потекло од Сирија, 172 се државјани на Авганистан, а 39 се од Ирак.
Според податоците на МВР, од мигрантите на кои вчера им биле издадени потврди, 167 биле мажи, 99 жени, 183 деца што го придружуваат носителот на потврдата и две деца што патувале без родител.
Од 1 јануари, заклучно со вчерашниот ден, низ земјава, според МВР, поминале вкупно 80.627 мигранти, на кои им бил издаден ваков документ.
До Секторот за азил, во последните 24 часа не биле поднесени нови барања за признавање на правото на азил. Од почетокот на годината досега, да останат во земјава побарале 10 странски државјани.