Утре, по повод четири месеци од смртта на малата Тамара Димовска од Велес, граѓанското движење „Протестирам“ ќе организира протестен марш од пристапот кон Владата на булевар Свети Климент Охридски до Министерството за здравство, на кој ќе побараат оставка и одговорност од министерот за здравство Никола Тодоров.
„Оставките на двајцата, сега веќе поранешни директори на ФЗОМ, Маја Парнарџиева-Змејкова и Џемали Мехази, не се доволни. Најодговорен за смртта на Тамара е сѐ уште актуелниот министер за здравство, Никола Тодоров, кој вети дека ќе бидат платени сите трошоци за лекување и за операција на Тамара, притоа излегувајќи од рамките на своите надлежности, а нам ни го одзеде правото да бидеме хумани и сами како граѓани да ги собереме потребните средства, зашто не верувавме дека некој може да биде толку суров и да излаже цел еден народ, за едно болно деветгодишно девојче, кое бара шанса за живот. Ве повикуваме да ни се придружите на протестниот марш на 9 јуни во 18 часот, од пристапот кон Владата на булевар Свети Климент Охридски до Министерството за здравство. Да им покажеме на властите дека не сме ја заборавиле Тамара, дека бараме правда за неа и дека нема да дозволиме убијци на деца да бидат на власт“, се вели на фејсбук-поканата за маршот.