По изборот на тројцата потпретседатели на Собранието, пратениците го донесоа предлог законот за изменување и дополнување на Законот за заштита на укажувачи за кого гласаа 62 пратеници.
Претходно пратениците ратификуваа четири договори – Законот за ратификација на измените и дополнувањата на Конвенцијата за меѓународен железнички превоз (КОТИФ) од 9 мај 1980 година содржана во Протоколот од 3 јуни 1999 година (Протокол донесен во Вилнус), Законот за ратификација на Договорот помеѓу Владата на Република Македонија и Владата на Република Србија за соработка во областа на туризмот, Законот за ратификација на Договорот за воена финансиска соработка помеѓу Владата на Република Македонија и Владата на Република Турција и Договорот меѓу Македонската Влада и Израелската Влада за одбегнување на двојното оданочување и за заштита од фискална евазија по однос на даноците на доход.
За Предлог законот за изменување и дополнување на Законот за народниот правобранител гласаа 62 пратеници и 22 пратеници од немнозинските заедници.
Претседателот на Собранието Талат Џафери, рече дека по Предлог законот за дополнување на Законот за судовите нема да се расправа и гласа на оваа седница затоа што тој е системски закон кој се носи со двотретинско мнозинство.
Пратениците на ВМРО-ДПМНЕ ги бојкотираат пленарните седници на Собранието и не беа присутни на денешната седница.