Култен филм ќе добие Скопје, најавува екипата од филмскиот проект „Ослободување на Скопје“, кој ќе почне да се снима утре, во Велес. Филмот, како македонско-хрватско-финска копродукција, ќе го режира Раде Шербеџија, кој го адаптираше сценариото на Душан Јовановиќ.
Буџетот на филмот е два милиона и 110 илјади евра, од кои еден милион и 250 илјади евра се од Агенцијата за филм на Македонија.
– Додека живеев во Америка, размислував како да направам филм од таа прекрасна претстава, која имаше толку голем успех во светот. Тоа е неверојатна приказна за Македонија, романтична приказна за војната и за една невозможна љубов меѓу Македонка и германски офицер – рече Шербеџија.
Главната улога во филмот ќе ја игра десетгодишниот Давид Тодосовски. Кинематографер е Дејан Димески, а на музиката ќе работи Влатко Стефановски.
Филмот ќе се снима во Велес и во Битола, а снимањето ќе заврши во Скопје до 19 декември.