Претседателот Стево Пендаровски се обрати на Годишниот самит на Глобалниот парламент на градоначалници којшто се одржува во Скопје од 17-19 ноември, а чиј домаќин е градоначалничката на Скопје, Данела Арсовска, информираат од Кабинетот на претседателот.
Овогодинешниот самит е насловен „Моќни, инклузивни и грижливи градови: Обезбедување на демократија и развој со генерациите кои доаѓаат“ и на истиот учествуваат над стотина градоначалници, како и голем број на претставници на меѓународни организации.
Учесниците на Самитот преку структурирани пленарни дебати имаат можност да дискутираат на теми поврзани со итни глобални прашања во градовите, како и теми од повеќе области каде што би се имплементирале нивните позитивни искуства и можностите за вмрежување на градските лидери.
„Верувам дека овој Самит и воопшто работата на Глобалниот парламент на градоначалници може да придонесе сите наши градови, вклучувајќи го и Скопје, да станат подобри места за живеење“, изјави претседателот Стево Пендаровски.
Во Скопје пристигнаа градоначалници од пет континенти, кои ја одржаа седницата на Управниот одбор на Глобалниот парламент на градоначалници со цел носење на стратешките заклучоци пред почетокот на годишниот самит.
Со размена на меѓународни искуства, меѓусебна соработка и заеднички проекти, градоначалниците преку глобалната платформа на Глобалниот парламент на градоначалници, се придонесува за надминување на предизвиците и подобрување на услугите на локално ниво во интерес на граѓаните.
Годинава, Самитот на Глобалниот парламент на градоначалници чиј домаќин е градоначалничката Данела Арсовска, ја додели престижната награда за глобални градови „Бенџамин Барбер“ на градоначалничката Рохеј Малик Лоу од Банџул, Гамбија. Со наградата Бенџамин Барбер се оддава признание на градоначалниците за нивниот исклучителен придонес во глобално урбано управување и инспиративно лидерство.