Либиската војска пронашла околу 90 тела на убиени екстремисти на местата на неодамнешните воздушни удари извршени од коалицијата предводена од САД, во близина на упориштата на ИД кај градот Сирт.
Војската објавила фотографии од објекти во пустината, покриени со песок и со трева, наведувајќи дека овие позиции се користат за обука. На овие места е пронајдена муниција, појаси за самоубијци и стапици.
Воени претставници соопштија дека се уапсени две лица за кои се сомневаат дека се екстремисти, а четворица кои одбиле да се предадат се убиени.
Војската го зазеде Сирт по седуммесечна кампања, која заврши во декември минатата година.
Американски претставници соопштија дека на околу 45 километри југозападно од Сирт, користејќи наведувачка муниција, убиле 80 екстремисти, од кои некои планирале напади во Европа.
Либиската војска не открива повеќе детали за тоа која националност се екстремистите кои се предале, ниту каде претходно биле, но се наведува дека убиените побегнале од Сирт.