Најчеста причина за смрт од малигни неоплазми кај жените во периодот 2010-2022 година е малигната неоплазма на дојка, се вели во последниот извештај на Институтот за јавно здравје (ИЈЗ). Според презентираните податоци по години, забележливо е дека расте и бројот на новозаболени и бројот на смртни случаи, за разлика од минатите години.
Па така, од малигна неоплазма на дојка во 2010 година починале 310 жени, а во годините подоцна просекот се движи околу 280 жени годишно. Бројката на починати се зголемува во 2016 година – 338 смртни случаи, а минатата година е пикот – дури 356 жени ја загубиле битката со ракот на дојка.
Според податоците на Институтот за јавно здравје, видно се зголемува и стапката на морталитет од карцином на дојка. Во периодот од 2010 до 2022 година, стапката на морталитет е зголемена за 8,5 проценти.
Во 2010 година таа изнесувала 30 проценти, потоа има пад на стапката на морталитет, за во 2016 година да се искачи на 32,7 проценти, а потоа има тенденција на пораст. Пикот на стапката на морталитет е лани и изнесува 38,5 проценти.
Во исто време, во земјава е невозможно да се закаже термин за мамографија и за ехо на дојка во јавното здравство. Системот Мој Термин покажува дека во наредните три месеци нема ниту еден термин за жените да направат рутински превентивни прегледи. Месец октомври е месец за развој на свесноста за превенција од ракот на дојка, со цел да се стимулираат жените да вршат редовни прегледи, но тоа системски се покажува како невозможно.
Од друга страна, да се закаже ехо и мамографија на дојка во некоја од приватните амбуланти, чини повеќе од 6.000 денари, пари кои не секоја жена може да си дозволи да ги плати.