Девет пожари на отворено се регистрирани во последното деноноќие, информира Центарот за управување со кризи (ЦУК).
Пожарникарите гаселе пожари во Ѓорче Петров, Сарај и Гази Баба (заради запалено ѓубре), во Радовиш, Штип, Желино, Тетово, Маврово, како и во општина Демир Хисар.
„Центарот за управување со кризи (ЦУК) информира дека имало вкупно 2.111 повици на единствениот повикувачки број за итни случаи 112 во ЦУК во последното деноноќие. Сите итни случаи се пријавуваат на овој број, посебно кога граѓаните имаат животозагрозувачки ситуации. Истовремено, ЦУК информира дека е корисно да се следат препораките и информациите од медиумите за превенција, а и за реагирање при итни случаи“, велат оттаму.