Притворен е 50-годишен маж од Демир Хисар, кој се сомничи дека на два пати им се заканувал на своите сограѓани дека ќе ги убие.
Како што соопшти Основното јавно обвинителство – Битола, на 31 октомври осомничениот, во два одделни инциденти, „директно се заканувал на други жители на Демир Хисар дека ќе ги лиши од живот, предизвикувајќи кај нив вознемиреност и страв“.
Поради тоа, обвинителите повеле постапка по сторено кривично дело Загрозување на сигурноста согласно член 144 став 3 во врска со став 1 и во врска со член 45 од Кривичниот законик.
„Судијата на претходна постапка од Основниот суд во Битола го прифати предлогот на јавниот обвинител и на осомничениот му определи притвор во траење од осум дена“, соопшти Обвинителството.