„Во експресен судски процес, деветте демонстранти притворени по протестите на 5 мај, добија една затворска и осум условни казни. Откако беа приведени и притворени во крајно нечовечките услови што владеат во притворот во Шутка, демонстрантите го признаа делото за кое се обвинети, без оглед на апсурдноста на целиот процес“, се вели во дописот на „Цивил“ до медиумите.
Од невладината организација понатаму се наведува дека продолжува голготата на семејството на Мартин Нешковски.
– Тоа семејство изгуби два члена, а сега уште еден нивни член е казнет со затвор затоа што ја бара правдата. Затворска казна од десет месеци доби Горан Митановски, вујкото на Мартин Нешковски, 22-годишното момче кое беше брутално убиено од припадник на специјалните полициски единици, ноќта по изборната победа на ВМРО-ДПМНЕ во 2011 година. Таткото на Мартин изврши самоубиство речиси една година по смртта на неговиот син. Вујкото на Мартин, на протестите на 5 мај, се обидел да ја заштити својата сестра од насилното однесување на полицијата – велат од организацијата.
Тие потсетуваат дека сѐ уште има луѓе во притвор или се под истрага по протестите на 5 мај и спротивно на законските прописи, полицијата сѐ уште не им ги вратила мобилните телефони на приведените.
– Ова е уште еден доказ за повеќекратно и грубо кршење на човековите права и за очигледната намера на власта да внесе страв кај граѓаните – велат од „Цивил“.