Стотина главно млади луѓе излегоа на денешниот марш против загадувањето на воздухот во центарот на Скопје, во организација на невладината „Гоу грин“, пишува „Радио Слободна Европа“.
Демонстрантите, кои носеа гас-маски, за симболично да покажат дека во Скопје тешко се дише, извикуваа „Биди зелен“, „Кој е крив што градот ни е сив“ и „Сакаме чист воздух“.
Тие велат дека Скопје е можеби најзагаден европски град.
– Од ден на ден, нивото на ПМ10-честичките се зголемува сè повеќе, обојувајќи го градот во сиво. Секои 10 микрограми ПМ10-честички во еден кубен метар воздух го зголемуваат ризикот за рак на бели дробови за дури 22 отсто, а во Скопје нивото на овие честички достигна дури и до 700 микрограми на еден кубен метар. Дозволеното ниво на овие честички изнесува максимум 50 микрограми на еден кубен метар – велат организаторите, кои бараат конкретни мерки за спречување на загадувањето.