Граѓаните се тие кои ќе одлучат на референдум, а јас како премиер и господинот Ѓорге Иванов како претседател треба да им помогнеме на граѓаните, а не да им одмогнеме, одговори премиерот Зоран Заев на новинарско прашање во врска со соопштението од кабинетот на претседателот Ѓорге Иванов.
– Ние политичарите треба да им служиме на граѓаните и треба да градиме соработки, да ја унапредуваме Македонија во сите нејзини перспективи. Во таков случај, јас верувам дека ние ќе имаме состаноци, таму можеме да ги вадиме сите аргументи, секој да постапува согласно своите надлежности и да не заборавиме дека сме поставени од граѓаните. Тие не поставуваат, тие не менуваат и согласно за вака важно прашање одлучивме референдумското изјаснување да биде многу важно – рече Заев по отворањето на Бизнис форумот-инвестициски проекти и можности во секторите транспорт, енергетика и животна средина во Македонија.
Тој повтори кои се перспективите ако се реши проблемот, но и дека ќе направи се за да се склучи договор со Грција кој ќе биде достоинствен и ќе го сочувува нашиот идентитет и ќе ги чува интересите на граѓаните и обезбедувајќи им евроатлантска перспектива.
„Знаеме дека интеграциите ни се достапни, знаеме дека веднаш стануваме членка на НАТО, знаеме дека почнуваме преговори со ЕУ. Сето тоа ни е на повидок, наше е да одлучиме“, додаде Заев.
Апелираше до сите политички чинители да бидат внимателни и да им помогнат на граѓаните, а не да им одмогнат во демократското право на носење одлуки.