Министерот за внатрешни работи, Митко Чавков, и директорот на Управата за безбедност и контраразузнавање (УБК), Љупчо Андоновски, денеска ги посетиле специјалните единици на МВР, односно Единицата за специјални задачи (ЕСЗ) и Единицата за брзо распоредување (ЕБР), соопштија попладнево од Министерството за внатрешни работи.
„За време на посетата, беа реализирани активности согласно програмата за работа и за обука на единиците, а воедно беа опфатени и тематски содржини од делокругот на специјалните обуки и материјално-техничките средства неопходни за успешна реализација на активностите и на планот за работа на единиците“, стои во соопштението.
За утре, во 13.30 часот, е предвидена посета на претседателот на државата, Ѓорге Иванов, на МВР, каде што ќе има средба со министерот Митко Чавков и со директорите на Бирото за јавна безбедност (БЈБ) и на УБК, Горанче Савовски и Љупчо Андоновски.