Тројцата средношколци Јан Стојановски, Матеј Гелев и Емилија Николовска кои освоија златен, сребрен и бронзен медал, како и специјална награда за најдобар постигнат резултат и Матеа Митревска која доби пофалница за успешно учество на 4. Балканска олимпијада во физика денес се сретнаа со претседателот Пендаровски.
На средбата присуствуваа и дел од учесниците на 52. Меѓународна олимпијада по физика што се одржа од 10 до 17 јули годинава, каде нашите олимпијците освоија еден бронзен медал и три пофалници.
Претседателот Пендаровски им честитше на учениците за постигнатите успеси и освоениот златен медал, што претставува досега најголем средношколски успех на нашата земја на меѓународна олимпијада.
Воедно, претседателот ги охрабри учениците да продолжат да вложуваат во своите теоретски и практични знаења, посочувајќи дека ваквите достигнувања треба да бидат вреднувани и да претставуваат мотив и инспирација за учениците да се бават со природните науки, како перспективни и значајни области за севкупниот развој.
На средбата, претседателот го поздрави и ангажманот на професорите од Институтот за физика и Природно-математичкиот факултет, членови на Друштвото на физичарите, кои со своите залагања придонесуваат за промоција на физиката во Северна Македонија.