Опитот за двојно поголеми приноси на пиперката ајварка во Битолско донесе позитивни резултати. Со македонски еколошки препарат, кој содржи калциум и магнезум, намалена е употребата на пестициди при производството на ајварка.
Првиот задругар во Пелагониско, земјоделецот Благоја Ѓоргиевски од селото Кукуречани, на почетокот од јули, постави демонстративен опит на површина од близу девет декари и доби двојно поголемо производство на пиперки.
– Вакви резултати немам видено досега. Растенијата се здрави и поотпорни на болестите и на штетниците, со што се намали и употребата на пестициди. Приносот е зголемен, вегетацискиот период е скратен, а плодот е здрав и крупен, со одлична боја на пиперка ајварка. Со овој опит се доби и поголема економска вредност на пиперката – вели земјоделецот Ѓоргиевски.