Од Здружението на новинарите на Македонија (ЗНМ) и Советот за етика во медиумите во Македонија (СЕММ) бараат веднаш да престанат вербалните и сите други напади врз новинарите во земјава. Во заедничкото соопштение се тврди дека во изминативе денови двајца новинари во одвоени инциденти биле вербално нападнати од лица на кои не им се допаѓало известувањето за одредени теми.

„Последните напади доаѓаат во пресрет на 2-ри ноември, Меѓународниот ден против неказнивоста на нападите кон новинарите. Овие напади се само дел од низата регистрирани последнава година, вкупно 14 на број. Укажуваме дека само еден случај на закана кон новинарка, беше решен со судска пресуда во 2020 година, што е разочарувачки“, се наведува во соопштението на ЗНМ и СЕММ.

Во првиот случај, предмет на вербален напад бил новинарот Мартин Богатиноски од „Плусинфо“, кој посведочил дека истиот дошол од страна на свештено лице на МПЦ-ОА. Според колегата Богатиновски, на погребот на негово блиско лице од семејството, имало инцидент од страна на присутниот поп, кој вербално го омаловажувал новинарот на „Плусинфо“ поради претходно објавени текстови во врска со МПЦ-ОА.

Во укажувањата од новинарот Богатиновски се вели дека инцидентот се случил откако новинарот побарал објаснување од попот, зошто не е дозволено свештеник од Православната охридска архиепископија (ПОА) да учествува на верскиот чин на погребот.

„Попот многу се вознемири кога слушна каде работам, па веднаш ме нападна дека ние новинарите од Плусинфо сме задртени новинари, што и да му значеше тоа. Потоа, рече дека сме предавници, неверници и продадени души, наведувајќи колку му пречи тоа што на Плусинфо се објавувале бројни текстови против МПЦ-ОА“, пишува Богатиновски.

Во текот на вчерашниот ден, новинарот Богатиновски на неговиот профил на социјалните медиуми укажа дека истиот поп телефонски се јавил на неговите родители, по што заканите продолжиле.

Во друг инцидент, новинарката Памела Цилаков дописник за Велес од Македонската радио-телевизија (МРТ) вели дека родители на деца од подрачното основно училиште „Васил Главинов“ во село Клуковец, за кое таа изготвувала сторија, вербално ја нападнале. Вербалната расправија според Цилаков, дошла до ниво во кое таа стравува дека може да биде и физички нападната. Откако сторијата за овој инцидент ја објавил локален портал, Цилаков добила низа на непријатни пораки преку Фесјбук од жителите на истото село, со закани дека ќе ја тужат и пријават во полиција поради давање лажен исказ.

„Во континуитет укажуваме дека работата на новинарите е јавна, а нивното право на слободно известување е неприкосновено право. Сепак, вербалните напади врз новинарите продолжуваат и нема санкции“ се вели во соопштението на ЗНМ и СЕММ.

Освен јавна осуда на овие инциденти, ЗНМ и СЕММ бараат да има и формално проследување на настаните од страна на одговорните институции и службените лица. Истовремено, тие очекуваат и дека МПЦ – ОА ќе се огради од неодговорните настапи на поединци кои се дел од МПЦ -ОА, и воедно ќе им укаже дека односот кон јавноста мора да биде проследен со одговорен, а не насилнички пристап, секогаш, па дури и кога не се согласуваат со ставовите на новинарите и граѓаните.

foom-logo-disklejmer

Текстот е изработен во рамки на проектот „Опсерваторија на медиумските реформи“, што го спроведува Фондацијата за интернет и општество „Метаморфозис“, со финансиска поддршка на „Фондацијата Отворено општество – Македонија“.

Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.