Извор на фотографија: Александар Ефтимов

Извонреден спортски успех постигна деветнаесетгодишната Мила Рељиќ од таеквондо клубот „Тигри“ од Скопје. Таа викендов освои златен медал во конкуренција сениорки (62 килограми) на меѓународниот таекводно натпревар „Винер Израел Опен“ од Г2 серијата на меѓународните светски натпревари.

„На натпреварот учествуваа повеќе од 270 натпреварувачи од 25 земји во светот меѓу кои и САД, Кореа, Индија, Бразил, Шпанија, Германија, Велика Британија. Во својата категорија, сениорки, Мила во борбата за златениот медал ги победи и репрезатативката на Израел, Наама Биненсток а во финалната борба со доминација ја победи и бронзената од последните Панамерикански Игри, претставничката од Еквадор Мел Мина“, информира тренерот Александар Ефтимов.

Тој вели дека ова е прв златен медал за Мила, која по освоениот бронзен медал во Загреб во јуни месец годинава ја докажа својата светска класа.

Ефтимов најавува и нови успеси на младата Мила бидејќи претстојат Европското клубско првенство кое ќе трае од 22 до 26 август во Талин, Естонија, потоа,  Европското првенство за млади до 21 година, кое ќе се случи на крајот на месец септември во Албанија, а исто така тој се надева на успех и на светското првенство кое ќе се одржи во ноември во Мексико.

Напишете коментар