Жителите на селото Требеништа бараат надлежните да ги санираат оштетените браници на магистралниот пат Кичево – Охрид, кој минува покрај селото. Велат дека приоритет се заштитните браници и металната ограда кај надвозникот на локалниот пат што води кон селото Требеништа, кои биле оштетени во јуни.
– Патот кој води до Требеништа е навистина фреквентен, постојано се движат возила и луѓе, а магистралниот пат е веднаш над него. Откако е оштетена оградата и браникот, доведено е во опасност движењето по тој локален пат. Бараме што поскоро да се санира, се јавувавме и до надлежните, но досега никој ништо нема преземено – велат жителите.
Тие додаваат дека на овој дел од патниот правец често се случуваат незгоди поради што и е неопходно поправање на оградата и на браникот.
