Жителите на општина Кривогаштани и на околните села, денеска во знак на протест го блокираа регионалниот пат Кривогаштани – Воѓани, барајќи да се реализира најавената реконструкција на регионалниот пат, кој ги поврзува овие две населени места.
Реконструкцијата на патот беше дел од изборната програма на градоначалникот на општината, а го има и во програмата на Општината за 2015 година.
Патот, како реализиран проект, го има и во отчетот на ВМРО-ДПМНЕ во делот „Реконструкција на локални патишта“ за периодот од 2011 до 2014 година.
– Во име на Советот на Општина Кривогаштани, овде имаме тројца советници на СДСМ. Од градоначалникот Тони Заткоски бараме веднаш да се зафати со работа на регионалниот пат Кривогаштани – Воѓани затоа што ни е потребен и затоа што е од јавен интерес. Во овие две години колку што сме советници, на секоја нова седница имаме писмено обраќање од негова страна до нас, дека патот ќе биде направен, дека е во програмата за работа, но, еве, и самите гледате дека патот го нема – вели советничката на СДСМ, Дијана Ацеска.
Б.Б.
