Жител од струшкото село Ливада со иницијали М.З. (62) од струшкото село Ливада вчера бил повикан на службен разговор во Надворешната канцеларија за криминалистички работи Струга, соопшти Министерството за внатрешни работи.
Тој се сомничи дека во рок од половина час (од 6:45 до 7:15 часот) вчера, 10.01.2023 г. со својата пушка усмртил седум кучиња скитници.
„Од него, одземена е ловечка пушка сачмарка калибар 16 милиметри за вештачење. По целосно документирање на случајот ќе биде поднесена соодветна пријава по член 233 од Кривичниот законик“, наведено е во соопштението.
Здружението за заштита на животните „Анима мунди“ вчера сподели видеоснимка на која се гледаат трупови на кучиња натоварени на камион и информираше дека во Струга се убиени десетици маалски бездомни кучиња.
Исто така, повеќе здруженија и активсти упатија отворено писмо до министерот за внатрешни работи Оливер Спасовски, во кое тврдат дека за помалку од 24 часа во Струга се убиени повеќе бездомни кучиња.
Градоначалникот на Струга, Рамис Мерко пред да се случи овој настан најави дека ќе го реши проблемот со уличните кучиња. Тој истакна дека општината нема капацитет за отварање на Центар за нивно згрижување, но ќе превземат активности за хуман третман односно контрола на популацијата преку стерилизација и кастрација.
„Кучињата скитници се голем проблем со кој треба да се справуваме. Ние работиме во изнаоѓање на решение со тоа што ние навистина како локална самоуправа не можеме сами да се справиме со кучињата скитници. И да направиме Центар за нивно згрижување кој може тоа да го издржи“, рече Мерко.
Тој истакна дека изминативе години општината исплатила милионски суми за отштети кон нападнати жители од улични кучиња и затоа смета дека е подобро ако тие пари се дадат на институцијата која ќе се занимава со таа проблематиката.
