fbpx

Железница предвидува два патнички воза помалку во возниот ред за 2020 година

-

Наместо зголемување на бројот на патнички возови, догодина е можно да сообраќаат помалку патнички возови во земјава. Според постојниот Нацрт – возен ред за 2020 година, од 15 декември би сообраќале по два воза помалку од железничката станица Скопје. Експресниот воз „Хераклеа“ на релација Скопје – Битола – Скопје е отстранет од возниот ред за наредната година. Оваа најбрза врска меѓу Скопје и Битола не сообраќа од август 2018 година, поради тоа што еден од новите кинески возови е расипан.

Железници на РСМ – Транспорт планира да укине и по еден пар патнички возови на релација Скопје – Велес – Скопје, и тоа досегашниот воз што поаѓаше од Скопје во 4:15 часот, односно од Велес кон главниот град во 6:10 часот. Поради ова, ќе биде променето поаѓањето на другите утрински возови од Велес за Скопје, кои би тргнувале во 5:03, 5:45, 6:13 и 7:26 часот од велешката железничка станица. Идната година меѓу овие два града би сообраќале по девет пара возови дневно во текот на целата година.

Кон другите релации во земјава, и во 2020 година ќе останат да сообраќаат по два пара возови дневно на релација Скопје – Гевгелија – Скопје, три пара на релација Скопје – Битола – Скопје, четири пара возови на релација Скопје – Куманово – Скопје и по еден пар возови дневно меѓу Скопје и Кочани и меѓу Скопје и Кичево.

Во меѓународниот железнички сообраќај, брз воз ќе има единствено на релацијата Скопје – Приштина – Скопје, и тоа по еден дневно. „Хелас експрес“ за Солун и Белград ќе сообраќа единствено во летните месеци, во периодот од 13/14 јуни до 20/21 септември 2020 година.

Од Железници на РСМ – Транспорт за „Мета.мк“ велат дека во интерес на железницата е да имаат пуштено во сообраќај повеќе возови за патниците. Сепак, нивниот возен ред се прави во согласност со расположливиот број на моторни возови, локомотиви и вагони.

Во однос на експресниот воз Скопје – Битола – Скопје, од Железници велат дека штом се отстранат сите пречки поради кои привремено еден од кинеските возови е надвор од сообраќај, истиот воз веднаш ќе биде воведен во сообраќај. За возот кон Белград и Солун, соседните железнички управи „Србија воз“ и „TrainOSE“ имале непроменет негативен став во однос на сообраќањето на овој експресен воз во текот на целата година.

Од Железници на РСМ – Транспорт нагласуваат дека постои можност догодина да се воведат нови патнички возови меѓу Скопје и кумановското село Бељаковце, доколку се заврши изградбата на оваа пруга од железничкото поврзување со Бугарија.

– Откако ЈП за железничка инфраструктура ќе ја пушти во употреба споменатата делница, ЖРСМ Транспорт врз база на расположивиот возен парк и времето на патување до соодветните дестинации, сериозно ќе ја разгледа можноста за покривање и на овој реон со железнички патнички превоз – посочуваат од железничкото претпријатие.

Дека состојбата со патничкиот железнички сообраќај не е розова, минатата недела потврди и Државниот завод за ревизија, којшто изврши ревизија на сметката на Министерството за транспорт и врски за 2018 година. Ревизорите утврдија дека од државниот буџет се издвојуваат помалку субвенции за патничките возови наспроти реалните трошоци за одржување на сообраќајот, кои ги пријавува ЖРСМ – Транспорт на годишно ниво.

Со нецелосно субвенционирање на трошоците во патничкиот сообраќај, ревизорите заклучуваат дека се доведува во прашање обезбедувањето квалитетна услуга од јавен интерес – превоз во железничкиот сообраќај.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

„Шорткат“: Апликацијата ДИА како асистент на лицата со дијабетес

Во вечерашното издание на емисијата „Шорткат“ ги имаме Ѓорѓина Ристовска и Марио Мијатовиќ - млади иноватори кои ја креираа апликацијата ДИА, како асистент на лицата со дијабетес. Инспирирани од...