Патничкиот и товарниот железнички превоз се повторно во функција по петчасовниот штрајк на железничарите поради неисплатената плата за април. Возовите сообраќаат по редовниот возен ред по 13 часот, откако утрово вработените од влеча на возови во депото „Лисиче“ престанаа со работа.
Платата за април на сите вработени во Железници на РСМ-Транспорт им е исплатена во текот на денов, поради што штрајкот веднаш е прекинат.
Вработените во државното железничко претпријатие изминативе месеци често одржуваат штрајкови поради неисплатени плати. Железници на РСМ-Транспорт се најголемиот државен загубар со години наназад, а досегашниот договор на вработените со менаџментот е платите да се исплаќаат најдоцна до 25-ти во месецот за претходниот месец, иако законскиот рок за исплата на плата е до 15-ти во месецот.