Украинскиот претседател Володимир Зеленски ги повика своите сојузници да донесат промена на режимот во Русија, неколку часа откако во рускиот напад со беспилотни летала и ракети врз Киев загинаа 26 лица, меѓу кои и три деца. Украинскиот претседател рече дека верува оти Русија може да биде притисната да ја запре војната.
„Но, ако светот не се стреми да го промени режимот во Русија, тоа значи дека дури и по завршувањето на војната, Москва сепак ќе се обидува да ги дестабилизира соседните земји“, рече тој, зборувајќи виртуелно на конференција по повод 50-годишнината од Хелсиншките договори од времето на Студената војна.
Во нападите на Русија во текот на ноќта беа повредени најмалку 150 лица, соопштија властите. Бројот на жртви претходно изнесуваше 16, меѓу кои и две деца, но беше ревидиран во петок откако спасувачите извлекоа 10 тела од урнатините на станбена зграда во населбата Свјатошински, вклучувајќи го и телото на двегодишно дете, според Министерството за внатрешни работи.
Русија лансира повеќе од 300 беспилотни летала и осум крстаречки ракети кон Украина – со Киев како главна цел – од доцна во среда до рано утро во четврток, соопштија украинските воздухопловни сили. Една ракета пробила деветкатница во западниот дел на главниот град, откорнувајќи ја нејзината фасада, соопштија властите.
Зеленски рече дека меѓу повредените има 16 деца и шест полицајци. Тоа е најголемиот број повредени деца во еден напад врз Киев за време на војната, соопшти службата за спасување.
Доналд Трамп ги критикуваше постапките на Русија во Украина, сугерирајќи дека доаѓаат нови санкции против Москва.
„Мислам дека е лошо она што го прават. Ќе воведеме санкции, но не знам дали санкциите го мачат, рече Трамп, осврнувајќи се на рускиот претседател Владимир Путин. Нападот на Русија дојде само неколку дена откако Трамп издаде ултиматум од 10 до 12 дена за Москва да ја запре инвазијата или да се соочи со санкции.
