Здравствената состојба на словачкиот премиер Роберт Фицо, кој вчера беше застрелан петпати, е стабилизирана, но e сè уште сериозна, изјави вицепремиерот на Словачка Роберт Калинак, пренесува Би-би-си.
Фицо беше застрелан додека ја поздравувал толпата пред културен центар во градот Хандлова, каде што се одржал владин состанок. Вчера медиумите известуваа дека Фицо бил во животозагрозувачка состојба.
Станува збор за првиот обид за атентат врз европски премиер во дваесет години.
Приведено е осомниченото лице, кој неофицијални извори велат дека е 71-годишен автор и политички активист. Министерот за внатрешни работи Сутај Есток го опиша вчерашното пукање како „политички мотивиран обид за атентат“.
Премиерт Фицо е контроверзен политичар. Тој се врати на власт во Словачка по изборите во септември минатата година со популистичко-националистичка коалиција. Стана познат надвор од границите на Словачка откако повика на прекин на воената помош за Украина и санкциите кон Русија.
Во својата држава, пак, тој е исто така познат по тоа што често има конфликти со новинари, кои редовно ги навредува и смета дека вршат „хајка“ против него. Имено, вчера исто така во словачкиот парламент се дискутираше предлогот на владата да се укине државната телевизија РТВС.
Илјадници луѓе изминатата недела протестираа против укинувањето на националната телевизија. Вчера беше откажан откако излезе веста за стрелањето на Фицо.
Вчера по социјалните мрежи се ширеше видео во кое човек, кој се смета дека е осомничениот, вели дека не се согласува со ставот на владата спрема медиумите. Би-би-си не потврди дали човекот во видеото е навистина приведеното лице.
Министерот за животна средина и вицепремиер Томаш Тараба изјави дека смета дека пукањето е резултат на „лажните наративи“ на опозицијата.
„Нашиот премиер неколку пати во минатото спомна дека се плаши дека тоа ќе се случи. Тој предупреди дека начинот на којшто власта беше нападната со лажни наративи може да ја предизвика прекумерна реакција кај луѓето и да доведе до вакво нешто“, вели Тараба.
„Многу од вас бевте тие кои ги сееја семињата на омраза“, им рече министерот за внатрешни работи Есток на новинарите на прес-конференција.
