Бомби, протести, апсења, полициска акција во Куманово, оставки, митинзи, поставување кампови, лидерски средби, преговори во Брисел… Изминавите неколку недели беа полни со политички случувања.
Сè се случуваше со огромна брзина и наеднаш запре и замре.
Опозицискиот СДСМ ги стави на пауза „бомбите“.
Граѓанското движење „Протестирам“ веќе неколку дена не одржува протести, туку состаноци на Школка во Градки парк.
Преговорите во Брисел меѓу СДСМ и ВМРО-ДПМНЕ веќе некое време се замрзнати.
Две клучни институции за безбедноста на државата веќе десет дена се без прв човек – без директори останаа Биро за јавна безбедност и Управа за безбедност и контраразузнавање.
Премиерот Груевски на митингот на плоштадот Пела рече дека атмосферата и психолошката состојба веќе почна да ѝ прави проблем на Македонија, особено во делот на нарачките и кај странските инвеститори.
Стопанските комори вчера предупредија дека доколку продолжи ваквата атмосфера, на земјата ѝ се заканува банкрот.
За вторник, 26 мај, е закажана нова лидерска средба во Клубот на пратениците.
За нови разговори во Стразбур или Брисел нема најави.