Извор на фотографија: Влада на РСМ

Седмиот состанок во рамките на иницијативата „Отворен Балкан“ започна денеска во Тирана со повикот од тројцата лидери Зоран Заев, Еди Рама и Александар Вучиќ до Црна Гора, Косово и Босна и Херцеговина да се приклучат до оваа иницијатива. Во албанскиот главен град вчера се одржаа жестоки протести пред одржувањето на Самитот, којшто за досегашниот премиер Зоран Заев ќе биде последен на којшто тој учествува.

Во своето воведно обраќање, премиерот Заев изјави дека иницијативата „Отворен Балкан“ е автентичен, заеднички процес на Северна Македонија, Албанија и Србија, но иницијативата е отворена за сите земји во регионот.

„Од првата средба во Скопје во јули и првото потпишување на договорите, покажавме дека силната политичка волја може да се трансформира во брзо функционирање на нашите институции, што несомнено го покажува нашиот капацитет како земји за спроведување брзи, ефикасни и напредни реформи. Токму овој капацитет ќе го покажеме пред европските институции на патот на нашите евроинтеграции“, изјави премиерот Зоран Заев.

На Самитот во Тирана учествуваат и комесарот за проширување и соседски политики на ЕУ Оливер Вархеји, генералната секретарка на Советот за регионална соработка Мејлинда Брегу, претставници на стопанските коморите на Албанија, Северна Македонија и Србија, како и голем број претставници на деловните заедници од трите земји и регионот, информираат од владината прес-служба.

Во Тирана денеска ќе бидат потпишани Договорот за условите за слободен пристап до пазарот на трудот на Западен Балкан, Договорот за интерконекција за шемите за електронска идентификација на граѓаните на Западен Балкан, Договорот меѓу владите на Република Албанија, Република Србија и Република Северна Македонија за соработка во областа на ветеринарството, безбедноста на храна и фитосанитарната политика.

На овој Самит на „Отворен Балкан“ ќе се потпишат и билатералните договори за признавање на одобренијата за Овластен економски оператор за безбедност и сигурност меѓу Република Северна Македонија и Република Албанија и меѓу Република Албанија и Република Србија.

Во делегацијата на состанокот во Тирана се и заменик-министерот за финансии, Димитар Ковачевски и заменик-министерот за земјоделство, шумарство и водостопанство, Трајан Димковски.

„Задоволство ми е да ви кажам дека денешниот ден е клучен момент во нашиот процес, бидејќи договорите што ќе бидат потпишани ќе направат важен чекор напред кон нашата цел – да гарантираме целосна слобода на движење на луѓе, стоки, капитал и услуги“, изјави Еди Рама, којшто исто така ги повика другите земји од Западен Балкан да се приклучат на повикот.