Милиони швајцарски франци на банкарски сметки сопственост на Светската фудбалска организација (ФИФА) денеска биле замрзнати на барање на истражните органи на САД, соопшти швајцарското министерство за правда.
Како што пренесува „Би-Би-Си“, американските власти, кои ја водат истрагата за корупцскиот скандал во ФИФА, во чиј фокус е нејзиниот претседател Сеп Блатер, веруваат дека парите од корупцијата биле трансферирани преку замрзнатите сметки.
Според медиумските извештаи, станува збор за сума од 50 милиони до 100 милиони швајцарски франци или околу 50,1 милиони до 100,2 милиони американски долари.
Денеска Блатер, кој е под суспензија на својата функција, е на сослушување пред етичкиот комитет на ФИФА. Тој попладнево пристигнал во седиштето на ФИФА во Цирих, придружуван од еден од своите адвокати.
Блатер ги отфрла сите обвиненија за корупција.
Етичкиот комитет на ФИФА отвори истрага по одлуката на швајцарското обвинителство да поведе кривична постапка против претседателот на ФИФА поради сомневање дека исплатил околу 2 милиони американски долари на претседателот на УЕФА, Мишел Платини, во 2011 година.
Двајцата ги отфрлија обвинувањата дека сториле нешто протизаконски. Во октомври тие добија тримесечени суспензии од етичкиот комитет на ФИФА.
