fbpx

Собранието го усвои дневниот ред на седницата, на која се разгледуваат петте владини закони со ЕУ знаменце

Овие предложени законски измени Владата ги испрати до пратениците, откако претходно изминатиов петок беа усвоени на владина седница

-

Собранието вечерва го усвои дневниот ред на 115-тата седница, откако претходно во претпладневните часови ја потврди потребата за носење на предложените измени на пет закони по скратена постапка, со употреба на системот на „европско знаменце“. Овие предложени законски измени Владата ги испрати до пратениците, откако претходно изминатиов петок беа усвоени на владина седница.

Станува збор за предложените измени на Законот за работни односи, за експропријација, за урбанистичко планирање, за градење и за утврдување на јавен интерес и номинирање на стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10-д (делница на автопатот Прилеп– Битола).

Од опозициската партија ВМРО-ДПМНЕ денеска испратија порака дека власта иако знае дека е злоупотреба, турка законски измени со европско знаменце.

„Нема поголем кочничар на ЕУ интеграциите на Македонија од актуелната криминална власт на ДУИ поддржана од СДС“, се вели во соопштението на ВМРО-ДПМНЕ.

Тие порачаа дека вицепремиерот Бојан Маричиќ наместо да го забрзува процесот на интеграција и да работи на почитување на европските вредности, тој ги крши и поради тоа треба да си поднесе оставка.

Од СДСМ пак попладнево реагираа дека Мицкоски и Апасиев заедно работат против европската иднина на државата, односно со лаги и манипулации водат хајка и против изградба на стратешкиот проект со Коридорите 8 и 10д.

„Законските измени со европско знаменце заштедуваат 150 милиони евра на граѓаните и 2 години помал рок на изведба а важат не само за коридорите 8 и 10д туку и за проекти финансирани од ЕУ“, стои во соопштението од СДСМ.

Македонската влада минатиот петок образложи дека со усвојувањето на петте предлог-измени на законите би се зголемила ефикасноста во изградбата на инфраструктурните објекти од стратешки национален и јавен интерес.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Собранието ги изгласа измените на Законот за извршување на санкциите

Со 78 гласа „за“, Собранието денеска го изгласа Предлог-законот за изменување и дополнување на Законот за извршување на санкциите. Од Министерството за правда соопштија дека Законот има за цел решавање...