Завршија комисиските расправи за пакетот закони за кои политичките партии потписнички на Договорот од Пржино во петокот постигнаа договор. Најдолга расправа имаше за измените на Кривичниот закон и за законот за приватност.
Пратеникот и координатор на пратеничката група на ДУИ, Талат Џафери, рече дека законот за приватност не е доволно добар, но за да не го кочат процесот, тие нема да прават никаков застој.
Тој рече дека со овој закон се овозможува кој сака и како сака да ја злоупотребува приватноста на луѓето и дека најоштетени од овој закон ќе бидат граѓаните.
Пратеничките Солза Грчева и Роза Топузова-Каревска рекоа дека целата оваа ситуација е вулгаризирање на законодавниот дом и дека не е во ред само четворица лидери на политички партии да одлучуваат за сите граѓани.
Во еден момент расправата прерасна во конфронтација помеѓу пратениците за тоа кој е поголем патриот и кој повеќе си ја сака државата.
По двочасовната расправа на Комисијата за политички систем и односи помеѓу заедниците, расправата во Законодавно-правната комисија заврши за неполни пет минути.
Законите во моментов се разгледуваат на пленарна седница.